വീണ പാടും ഈണം / Adhyapakakkoottam

അധ്യാപകക്കൂട്ടം വായനശാല

വീണ പാടും  ഈണം

Divya K

UPST

GHS AKALUR

    1)അപസ്വരം പുറപ്പെടുവിച്ച മാത്രയിൽ എല്ലാം മറന്ന് വാദകൻ ആക്രോശിച്ചു,' നാശം '.

വീണ പറഞ്ഞു കാംബോജി,കമാസ്, കല്യാണി, ഖരഹരപ്രിയ..

എന്നിൽ നീ മീട്ടിയ രാഗങ്ങൾക്ക്‌ നൂറു പേര്. വീണാവിദ്വാൻ, വീണശ്രീമാൻ.... ഞാനാൽ നീ നേടിയ പട്ടങ്ങൾക്കും നൂറു പേര്.പക്ഷേ, അതിനായ്, അതിനായ് വലിഞ്ഞു മുറുകിയ, അയഞ്ഞുതൂങ്ങിയ, തേഞ്ഞു തീർന്ന എന്റെ ഞരമ്പുകൾക്ക്  മാത്രം അന്നും, ഇന്നും ഒരേ പേര് - കമ്പികൾ, വെറും വീണക്കമ്പികൾ

2)   വായന കഴിഞ്ഞ് വാദകൻ തറയിലുപേക്ഷിച്ച ഒരു നാൾ വീണ നിലക്കണ്ണാടിയിലേക്ക് നോക്കി. വാദകനിഷ്ടപ്പെടും വിധം നീണ്ട ഉടലും, സമൃദ്ധമായ പിന്നഴകും, മിനുമിനുത്ത തൊലിയുമായ് തന്നെ ഇവ്വിധം ചെത്തിമിനുക്കി പാകപ്പെടുത്തിയ സൃ ഷ്ടാക്കളെ അവൾ ശപിച്ചു. കട്ടകളിൽ വരിഞ്ഞു മുറുക്കിയ കൈകാലുകൾ സ്വതന്ത്രമാക്കാൻ വൃഥാ  ശ്രമിച്ചുകൊണ്ടവൾ നിശ്ശബ്ദമായ് കരഞ്ഞു -നീ 'വീണ ' എന്നെന്റെ ചെവിയിൽ മൂന്ന് വട്ടം വിളിച്ചതിന്‌ പകരം നീ 'വീഴാ' എന്നെന്തേ ഒരു വട്ടം വിളിക്കാൻ തോന്നാഞ്ഞൂ...