🔸 അധ്യാപകരുടെ കൂട്ടായ്മയായ അധ്യാപകക്കൂട്ടം വാട്സ്ആപ് ക്ലാസ് ഗ്രൂപ്പുകളിൽ join ചെയ്യുന്നതിന് ക്ലാസ്സ്, വിഷയം എന്നിവ 9048175724 (രതീഷ് സംഗമം) എന്ന നമ്പരിൽ വാട്സ്ആപ് ചെയ്യുക. 🔹 പൊതു വിദ്യാലയ സംബന്ധമായ വിവരങ്ങൾ അധ്യാപകക്കൂട്ടം ബ്ലോഗിൽ ചേർക്കുന്നതിന് 9539091331 (ഗോകുൽ ദാസ്)എന്ന നമ്പരിൽ ബന്ധപ്പെടുക. 🔸അധ്യാപകക്കൂട്ടം യൂടൂബ് ചാനലിൽ പോസ്റ്റുകൾ പങ്കിടുന്നതിന് ബന്ധപ്പെടുക 7306521145 (സായി ശ്വേത). 🔹 അധ്യാപകക്കൂട്ടം ഫേസ് ബുക്ക് പേജിൽ പോസ്റ്റുകൾ പങ്കിടുന്നതിന് ബന്ധപ്പെടുക 8075438107 (ശാലിനി നീലംപേരൂർ).

Monday, May 20, 2024

സ്വാതന്ത്ര്യത്തിന്റെ അരുണോദയം / Adhyapakakkoottam

അധ്യാപകക്കൂട്ടം സ്വാതന്ത്ര്യസമര ചരിത്രം/ സംഭവങ്ങൾ

 72 .സ്വാതന്ത്ര്യത്തിന്റെ  അരുണോദയം.
       ബ്രിട്ടീഷ് പ്രധാനമന്ത്രി ആറ്റ്ലി 1947 ഫെബ്രുവരി 20ന് ബ്രിട്ടീഷ് പാർലമെന്റിൽ ഒരു പ്രഖ്യാപനം നടത്തി. 1948 ജൂൺ മാസം കഴിയും മുമ്പ് അധികാരം ഇന്ത്യക്കാർക്ക് കൈമാറും എന്നായിരുന്നു ആറ്റ്ലിയുടെ ചരിത്രപ്രധാനമായ പ്രഖ്യാപനം . "ക്യാബിനറ്റ് ദൗത്യസംഘത്തിന്റെ പദ്ധതിക്കനുരോധമായി  ഇന്ത്യയിലെ കക്ഷികളുടെ അംഗീകാരമുള്ള ഭരണഘടന പ്രകാരം സ്ഥാപിതമാകുന്ന അധികൃതർക്ക് അധികാരം കൈമാറാനാണ് ബ്രിട്ടീഷ് ഗവൺമെന്റിന്റെ ആഗ്രഹം. എന്നാൽ നിർഭാഗ്യത്തിന് അത്തരമൊരു ഭരണഘടനയും അധികൃത സ്ഥാപനവും ഉണ്ടാകാൻ ഇപ്പോൾ വ്യക്തമായ സാധ്യതകൾ കാണുന്നില്ല". ആറ്റ്ലി പറഞ്ഞു.  നിശ്ചിത സമയത്തിനകം അത്തരമൊരു  ഭരണഘടന ഉണ്ടായില്ലെങ്കിൽ രാജ്യത്തെ മൊത്തത്തിൽ പ്രതിനിധാനം ചെയ്യുന്ന ഒരു കേന്ദ്ര ഗവൺമെൻ്റിനോ അല്ലെങ്കിൽ നിലവിലുള്ള ചില പ്രവിശ്യാ ഗവൺമെന്റുകൾക്കോ  ഇന്ത്യൻ ജനതയുടെ ഉത്തമ  താൽപര്യങ്ങൾക്ക് അനുയോജ്യം എന്ന് തോന്നുന്ന മറ്റ് സംവിധാനങ്ങൾക്കോ  അധികാരം കൈമാറും എന്നും അദ്ദേഹം കൂട്ടിച്ചേർത്തു.
    കോൺഗ്രസും ലീഗും ഒന്നിച്ച് നിന്നാൽ ഒരു ഏകീകൃത കേന്ദ്ര ഗവൺമെന്റിന് അധികാരം കൈമാറും.  ഇല്ലെങ്കിൽ ഇന്ത്യയെ വെട്ടിമുറിക്കും ഇതായിരുന്നു പ്രഖ്യാപനത്തിന്റെ പൊരുൾ.  ലീഗിൻ്റെ വിഭജനവാദത്തിനും ചില നാട്ടുരാജ്യങ്ങളുടെ സ്വതന്ത്ര പദവി മോഹത്തിനും പ്രോത്സാഹനം നൽകുന്നതായിരുന്നു ആറ്റ്ലിയുടെ പ്രഖ്യാപനത്തിന്റെ അവസാന ഭാഗം.
     അധികാര കൈമാറ്റം സുഗമമാക്കുന്നതിന് വൈസ്രോയി സ്ഥാനത്ത് വേവലിനെ മാറ്റി പകരം മൗണ്ട് ബാറ്റൺ പ്രഭുവിനെ നിയമിക്കുന്നതായും ആറ്റ്ലി അറിയിച്ചു . ബ്രിട്ടീഷ് രാജകുടുംബത്തിലെ അംഗമായ മൗണ്ട് ബാറ്റൺ രണ്ടാം ലോകയുദ്ധകാലത്ത് കിഴക്കൻ ഏഷ്യയിലെ സഖ്യസേനയുടെ തലവനായിരുന്നു.
    അധികാര കൈമാറ്റത്തിന് വ്യക്തമായ സമയപരിധി നിശ്ചയിച്ച ആറ്റ്ലിയുടെ  പ്രഖ്യാപനം 1947 മാർച്ച് 8 ന് ചേർന്ന കോൺഗ്രസ് വർക്കിംഗ് കമ്മിറ്റി സ്വാഗതം ചെയ്തു.  പുതിയ സാഹചര്യങ്ങളെക്കുറിച്ച് ചർച്ച നടത്താൻ മുസ്ലിം ലീഗ് നേതൃത്വത്തെ വർക്കിംഗ് കമ്മിറ്റി ക്ഷണിക്കുകയും ചെയ്തു. എന്നാൽ കോൺഗ്രസിന്റെ ക്ഷണത്തെക്കുറിച്ച് മുസ്ലിം ലീഗ് പ്രതികരിച്ചില്ല. അതേസമയം ആറ്റ്ലിയുടെ പ്രഖ്യാപനം ലീഗും സ്വാഗതം ചെയ്തു.  ബ്രിട്ടന്റെ സമ്മതത്തോടെ തന്നെ പാക്കിസ്ഥാൻ രൂപീകരിക്കാൻ കഴിയുമെന്ന പ്രതീക്ഷ പൂവണിയും എന്നതിലായിരുന്നു ലീഗിൻറെ സന്തോഷം. ഇന്ത്യയെ വിഭജിക്കുന്നതിനും പാകിസ്ഥാൻ രാഷ്ട്രം ഉണ്ടാക്കുന്നതിനും ബ്രിട്ടൻ അനുകൂലമാണെന്ന് ബോധ്യമായതോടെ പഞ്ചാബും വടക്കു പടിഞ്ഞാറൻ  അതിർത്തി പ്രവിശ്യയും സ്വന്തം നിയന്ത്രണത്തിൽ കൊണ്ടുവരാൻ ലീഗ് ശ്രമങ്ങൾ ഊർജിതമാക്കി. ബംഗാളിലും സിന്ധിലും മാത്രമേ അതുവരെ ലീഗിന് ഭൂരിപക്ഷം ഉണ്ടായിരുന്നുള്ളൂ.  പഞ്ചാബ് അസംബ്ലിയിലെ 175 സീറ്റിൽ ലീഗിന് ഉണ്ടായിരുന്നത് 79 അംഗങ്ങൾ മാത്രമാണ്. യൂണിയനിസ്റ്റ് പാർട്ടിയുടെ നേതാവായ ഖസീർഹയാത്ത്  ഖാനായിരുന്നു  പഞ്ചാബിലെ പ്രധാനമന്ത്രി.  ഖസീർഹയാത്ത്ഖാനെ പുറത്താക്കി ലീഗിന്റെ ഗവൺമെന്റ് ഉണ്ടാക്കാനുള്ള നീക്കങ്ങൾ   പരാജയപ്പെട്ടപ്പോൾ  ലീഗ്  വർഗീയ കലാപം സംഘടിപ്പിക്കാൻ മടിച്ചില്ല. ആ ശ്രമങ്ങളെ ഖസീർ ഹയാത്ത് ഖാൻ ശക്തമായി നേരിട്ടു.
      1947 മാർച്ച് 24ന് മൗണ്ട് ബാറ്റൺ ഇന്ത്യയുടെ പുതിയ വൈസ്രോയിയായി സത്യപ്രതിജ്ഞ ചെയ്തു. മുൻ വൈസ്രോയിമാർക്ക് നൽകിയതിലും കൂടുതൽ അധികാരങ്ങളോടെയായിരുന്നു മൗണ്ട് ബാറ്റൺ എത്തിയത്. അധികാര കൈമാറ്റം എന്ന ദൗത്യം നിറവേറ്റുന്നതിന് ആവശ്യമായ സ്വാതന്ത്ര്യവും അധികാരവും പ്രധാനമന്ത്രി  ആറ്റ്ലി പുതിയ വൈസ്രോയി ക്ക് നൽകിയിരുന്നു. ഇന്ത്യയിലെത്തിയ ഉടൻ തന്നെ മൗണ്ട് ബാറ്റൺ ചർച്ചകൾ തുടങ്ങി . മാർച്ച് 31നായിരുന്നു ഗാന്ധിജിയുമായി അദ്ദേഹം ആദ്യം ചർച്ച നടത്തിയത്. കോൺഗ്രസിന്റെ പ്രതിനിധികളായി വൈസ്രോയി യുമായി നിരന്തരം ബന്ധം പുലർത്തിയത് നെഹ്റുവും സർദാർ വല്ലഭായ് പട്ടേലുമായിരുന്നു . മൗലാനാ ആസാദ് , ആചാര്യ കൃപാലിനി തുടങ്ങിയവരായിരുന്നു മൗണ്ട് ബാറ്റനുമായി ചർച്ച നടത്തിയ മറ്റു കോൺഗ്രസ് നേതാക്കൾ. മുസ്ലിംലീഗിനെ പ്രതിനിധീകരിച്ച്  വൈസ്രോയിയുമായി ചർച്ചനടത്തിയത് ജിന്നയും,  ലിയാഖത്ത് അലിഖാനുമായിരുന്നു. മാർച്ച് 24 നും മെയ് ആറിനും ഇടയിൽ  133 കൂടിക്കാഴ്ച കളാണ്  വിവിധ നേതാക്കന്മാരുമായി  മൗണ്ട് ബാറ്റൺ നടത്തിയത്. അധികാര കൈമാറ്റത്തിന് മൗണ്ട് ബാറ്റൺ ആദ്യം തയ്യാറാക്കിയ പദ്ധതി നെഹ്റു കയ്യോടെ നിരാകരിച്ചു .ഇന്ത്യയെ പല രാഷ്ട്രങ്ങളായി ഛിന്നഭിന്നമാക്കുന്നതിന് വഴി തുറക്കുന്നതായിരുന്നു ആ പദ്ധതി . ഇന്ത്യ,  പാകിസ്ഥാൻ എന്നീ രാഷ്ട്രങ്ങൾക്ക് പുറമേ നാട്ടുരാജ്യങ്ങൾക്ക് വേണമെങ്കിൽ സ്വതന്ത്ര രാഷ്ട്രങ്ങളായി നിൽക്കാൻ അവകാശം നൽകണമെന്നായിരുന്നു മൗണ്ട് ബാറ്റന്റെ ആദ്യ പദ്ധതിയിലെ ഏറ്റവും വിനാശകരമായ നിർദ്ദേശം. നെഹ്റുവിൻറെ തീഷ്ണമായ എതിർപ്പ് കണ്ട ഉടനെ ആ പദ്ധതി ഉപേക്ഷിച്ചു. വീണ്ടും ചർച്ചകൾ നടത്തി നാട്ടുരാജ്യങ്ങളെ ഇന്ത്യൻ യൂണിയനിൽ സംയോജിപ്പിക്കുന്നതിൽ സുപ്രധാന പങ്കുവഹിച്ച വി പി മേനോന്റെ സഹായത്തോടെ മറ്റൊരു പദ്ധതിക്ക് മൗണ്ട് ബാറ്റൺ രൂപം നൽകി. ഇന്ത്യയെ പാക്കിസ്ഥാനും ഇന്ത്യയുമായി വിഭജിക്കുക എന്നതായിരുന്നു ഈ പദ്ധതിയുടെ കാതൽ. ജൂൺ മൂന്നിന് മൗണ്ട് ബാറ്റൺ ഈ പദ്ധതി പരസ്യമാക്കി.
     പാകിസ്ഥാൻ കിട്ടാതെ ഒരുതരത്തിലുള്ള ഒത്തുതീർപ്പും ഇല്ലെന്ന ജിന്നയുടെ പിടിവാശിയും,  പല ഭാഗങ്ങളിലും ആളിപ്പടരുന്ന വർഗീയ കലാപവും വിഭജന തീരുമാനം അംഗീകരിക്കാൻ കോൺഗ്രസിനെ നിർബന്ധിതമാക്കി. ഇന്ത്യയെ വിഭജിക്കാനുള്ള തീരുമാനത്തിൽ ഏറ്റവും ദുഃഖിതൻ ഗാന്ധിജിയായിരുന്നു. വിഭജനം രാജ്യത്തിൻറെ ഭാവിക്ക് ദോഷമേ ചെയ്യൂ എന്ന് ഗാന്ധിജി ചൂണ്ടിക്കാട്ടി. തൻറെ അഭിപ്രായം അവഗണിച്ചുകൊണ്ട് കോൺഗ്രസ് നേതൃത്വം വിഭജനത്തിന് പച്ചക്കൊടി കാണിച്ചതിൽ ഗാന്ധിജി ഖിന്നനായിരുന്നു.
     വിഭജനത്തിന്റെ മുഖ്യ എതിരാളിയായിരുന്നെങ്കിലും വിഭജന പ്രശ്നം ചർച്ച ചെയ്യാൻ ജൂൺ 14ന് ചേർന്ന എ.ഐ.സി.സി യോഗത്തിൽ കോൺഗ്രസിന്റെ പരസ്യമായ നിലപാടിന് പിന്തുണ നൽകാൻ ഗാന്ധിജി തയ്യാറായി. ഇതിൻറെ പേരിൽ കോൺഗ്രസുകാരിൽ ചേരിതിരിവുണ്ടാക്കേണ്ട എന്ന ചിന്തയായിരുന്നു ഗാന്ധിജിയെ ഇതിനു പ്രേരിപ്പിച്ച ഒരു ഘടകം.  മറ്റൊന്ന് ഗാന്ധിജിയുടെ വിശ്വസ്ത ശിഷ്യരായ നെഹ്റുവിനെയും പട്ടേലിനെയും തള്ളിപ്പറയാനുള്ള വൈമുഖ്യമാണ് . വിഭജന നിർദേശത്തെ ഗാന്ധിജിയുമായി ആലോചിക്കും മുമ്പ് തന്നെ പിന്തുണച്ചവരാണ് നെഹ്റുവും പട്ടേലും. ഗാന്ധിജിയുടെ അഭിപ്രായം ആരായാതെയായിരുന്നു കോൺഗ്രസ് വർക്കിംഗ് കമ്മിറ്റി മൗണ്ട് ബാറ്റന്റെ നിർദ്ദേശം അംഗീകരിച്ചത്.
      മൗണ്ട് ബാറ്റൻ തയ്യാറാക്കിയ പദ്ധതിയെ അടിസ്ഥാനമാക്കി ഇന്ത്യയ്ക്ക് സ്വാതന്ത്ര്യം നൽകുന്ന നിയമത്തിന്-  ഇന്ത്യ ഇൻഡിപെൻ്റൻസ് ആക്ട്-  ബ്രിട്ടീഷ് പാർലമെൻറ് ജൂലൈ 18ന് അംഗീകാരം നൽകി. ഇതോടെ അധികാര കൈമാറ്റത്തിനുള്ള തടസ്സങ്ങൾ എല്ലാം നീങ്ങി.
     സ്വതന്ത്ര ഇന്ത്യയുടെ ഭരണഘടനയ്ക്ക് രൂപം നൽകാനുള്ള ശ്രമങ്ങൾ മൗണ്ട് ബാറ്റൻ പദ്ധതി പ്രഖ്യാപിക്കും മുമ്പു തന്നെ തുടങ്ങിയിരുന്നു. 1946 ജൂലൈയിൽ നടന്ന തെരഞ്ഞെടുപ്പിന്റെ അടിസ്ഥാനത്തിൽ നിലവിൽ വന്ന ഭരണഘടന നിർമ്മാണ സഭയുമായി സഹകരിക്കാൻ ലീഗ് തയ്യാറായില്ല . പാക്കിസ്ഥാൻ രൂപീകരിക്കുമെന്ന് വ്യക്തമായതോടെ ലീഗ് ഭരണഘടന നിർമ്മാണ സഭയിൽ നിന്ന് പൂർണ്ണമായി വിട്ടുനിന്നു. പാകിസ്ഥാന്റെ ഭരണഘടന പാക്കിസ്ഥാൻ തയ്യാറാക്കുമെന്നായിരുന്നു ജിന്നയുടെ നിലപാട്. ഇന്ത്യയുടെ ഭരണഘടനാനിർമ്മാണ സഭയുടെ അധ്യക്ഷൻ ഡോ. രാജേന്ദ്രപ്രസാദ് ആയിരുന്നു .പാക്കിസ്ഥാൻ രൂപീകരണത്തിന്റെ മുന്നോടിയായി പാകിസ്ഥാന്റെ ഭരണഘടനയ്ക്ക് രൂപം നൽകാൻ ജിന്നയുടെ നേതൃത്വത്തിൽ പാക്കിസ്ഥാൻ ഭരണഘടനാ നിർമ്മാണ സഭ രൂപീകരിച്ചു.
       1948 ജൂണിനകം അധികാര കൈമാറ്റം നടക്കും എന്നായിരുന്നു ബ്രിട്ടീഷ് പ്രധാനമന്ത്രി വാഗ്ദാനം ചെയ്തിരുന്നതെങ്കിലും അത്രയും നീട്ടിക്കൊണ്ടുപോകേണ്ടതില്ലെന്ന പക്ഷക്കാരനായിരുന്നു മൗണ്ട് ബാറ്റൺ പ്രഭു. രൂക്ഷമായി വരുന്ന വർഗീയ സ്ഥിതിയാണ് കഴിയുന്നതും വേഗം ഇന്ത്യ വിടാൻ അദ്ദേഹത്തെ പ്രേരിപ്പിച്ച ഒരു ഘടകം. ഇന്ത്യ വിഭജിക്കാനും താൽക്കാലികമായി ഡൊമിനിയൻ പദവി അംഗീകരിക്കാനും കോൺഗ്രസും ലീഗും സമ്മതിച്ച സ്ഥിതിക്ക് അധികാര കൈമാറ്റം വൈകുന്നത് ബ്രിട്ടന്റെ താല്പര്യങ്ങൾക്ക് എതിരാകുമെന്ന് മൗണ്ട് ബാറ്റനു തോന്നി .1947 ആഗസ്റ്റ് 15ന് അധികാര കൈമാറ്റ ദിനമായി തീരുമാനിച്ചു . 
      1947 ആഗസ്റ്റ് 14 ആം തീയതി അർദ്ധരാത്രിക്ക് തൊട്ടുമുമ്പ് ഇന്ത്യൻ ഭരണഘടന നിർമ്മാണ സഭ ന്യൂഡൽഹിയിൽ സമ്മേളിച്ചു. മൗണ്ട് ബാറ്റൺ പ്രഭുവിനെ സ്വതന്ത്ര ഇന്ത്യയുടെ ആദ്യത്തെ ഗവർണർ ജനറലായി നാമ നിർദേശം ചെയ്തു .നിർണായകമായ സമ്മേളനത്തെ അഭിസംബോധന ചെയ്തുകൊണ്ട് ജവഹർലാൽ നെഹ്റു വികാരഭരിതനായി പറഞ്ഞു.
   " സംവത്സരങ്ങൾക്ക് മുമ്പ് നാം വിധിയുമായി ഒരു സന്ധിയുണ്ടാക്കി . ഇന്ന് സമ്പൂർണ്ണമായോ പൂർണതോതിലോ അല്ലെങ്കിൽ കൂടി വളരെ ഗണ്യമായ രീതിയിൽ നാം നമ്മുടെ പ്രതിജ്ഞ നിറവേറ്റുന്ന സമയം സമാഗതമായിരിക്കുകയാണ് . ഇന്ന് പാതിരാമണി മുഴങ്ങുമ്പോൾ ഇന്ത്യ ഉണർന്നെഴുന്നേൽക്കും. ഒരു പുതു ജീവിതത്തിലേക്കും സ്വാതന്ത്ര്യത്തിലേക്കും .ഒരു നിമിഷം ഇതാ സമാഗതമാകുന്നു. ചരിത്രത്തിൽ അത്യപൂർവ്വമായി മാത്രം വരുന്ന ഒരു നിമിഷം. പഴമയിൽ നിന്നും നാം പുതുമയിലേക്ക് കാലെടുത്തുവെക്കുന്നു. ദീർഘകാലമായി അടിച്ചമർത്തപ്പെട്ട ഒരു രാഷ്ട്രത്തിൻറെ ആത്മാവിന് ശബ്ദം വെക്കുന്നു .ഇന്ത്യയേയും ഇന്ത്യയിലെ ജനങ്ങളേയും മനുഷ്യരാശിയുടെ ലക്ഷ്യങ്ങളേയും സേവിക്കാൻ സ്വയം അർപ്പിക്കുമെന്ന് നാം പ്രതിജ്ഞ എടുക്കുന്നത് ഈ നിമിഷത്തിന് അനുയോജ്യമാണ്."  
       സന്തോഷ ലഹരിയിൽ ആറാടി നിറവെളിച്ചത്തിന്റെ പാൽക്കടലിൽ ചെങ്കോട്ടയും പരിസരവും മുങ്ങി നീന്തിത്തുടിക്കുമ്പോൾ, അങ്ങകലെ ബംഗാളിലെ ഒരു ഗ്രാമത്തിൽ ഇരുട്ടിൽ ഇത്തിരി വെളിച്ചം കാണാൻ കണ്ണുകൾ മിഴിച്ച് നിർന്നിമേഷനായി കഴിയുന്ന ഒരു കൊച്ചു മനുഷ്യനുണ്ടായിരുന്നു. ഒരു ഒറ്റയാൻ. ആ കൊച്ചു മനുഷ്യന് ഈ ആർഭാടങ്ങളിൽ ഒന്നുമായിരുന്നില്ല താല്പര്യം. അദ്ദേഹം വെളിച്ചം അന്വേഷിച്ചു നടക്കുകയായിരുന്നു- രാഷ്ട്രപിതാവ് മഹാത്മാഗാന്ധി .
       നെഹ്റു അനുസ്മരിപ്പിച്ചതുപോലെ ആഗസ്റ്റ് 14 അർദ്ധരാത്രിയോടെ ഒരു  യുഗം അവസാനിച്ചു. ആഗസ്റ്റ് 15 ന് ത്രിവർണ പതാക ഉയർന്നു. യൂണിയൻ ജാക്ക് താഴ്ന്നു. ദശാബ്ദങ്ങൾ നീണ്ട ത്യാഗപൂർണ്ണമായ സമരത്തിലൂടെ ഇന്ത്യയിലെ ജനങ്ങൾ സ്വാതന്ത്ര്യത്തിന്റെ യുഗത്തിലേക്ക് കടന്നു. പതിനായിരക്കണക്കിന് ധീര ദേശാഭിമാനികൾ  ജീവൻ ബലികൊടുത്ത ദശാബ്ദങ്ങൾ നീണ്ടുനിന്ന പോരാട്ടത്തിന്റെ ഫലമാണ് ഈ സ്വാതന്ത്ര്യം.
 തയ്യാറാക്കിയത്: പ്രസന്നകുമാരി ജി.

Sunday, May 19, 2024

ഒരു ദിനാന്തര സഞ്ചാരം / Adhyapakakkoottam

അധ്യാപകക്കൂട്ടം ക്ലാസ് 7 മലയാളം

ഒരു ദിനാന്തര സഞ്ചാരം

കേരളപാഠാവലി, ക്ലാസ് : 7,
കവിതാലാപനം - സംഗീത, പുനലൂർ





വർഗീയ കലാപങ്ങൾ / Adhyapakakkottam

അധ്യാപകക്കൂട്ടം സ്വാതന്ത്ര്യ സമര ചരിത്രം/ സംഭവങ്ങൾ

 71. വർഗീയ കലാപങ്ങൾ

              ഇന്ത്യയിലെയും ബ്രിട്ടനിലെയും സംഭവവികാസങ്ങളും യുദ്ധത്തിനു ശേഷമുള്ള ലോക സ്ഥിതിയും ഇന്ത്യയുടെ സ്വാതന്ത്ര്യം യാഥാർത്ഥ്യമാക്കുന്നതിന് അനുകൂലമായ അന്തരീക്ഷം സൃഷ്ടിച്ചിരുന്നു . ഐ എൻ എ.ഭടന്മാരെ മോചിപ്പിക്കാൻ ആവശ്യപ്പെട്ട് ആരംഭിച്ച പ്രക്ഷോഭം ഇന്ത്യയിലുടനീളം ജനങ്ങളെ ആവേശം കൊള്ളിച്ചു. പലസ്ഥലങ്ങളിലും പണിമുടക്കും ഹർത്താലും നടന്നു. സായുധസേനകളിലും ഇതിൻറെ സ്വാധീനം പ്രകടമാകുന്നുണ്ടായിരുന്നു.റെയിൽവേ, കമ്പിത്തപാൽ തുടങ്ങിയ തന്ത്ര പ്രധാന രംഗങ്ങളിലെ തൊഴിലാളികൾ പലസ്ഥലങ്ങളിലും പണിമുടക്കുകയും ചെയ്തു.  ഇതെല്ലാം ബ്രിട്ടീഷ് ആധിപത്യത്തിന് നേരെയുള്ള ഗൗരവതരമായ വെല്ലുവിളികൾ ആയിരുന്നു. ബ്രിട്ടനിൽ വിൻസ്റ്റൻ ചർച്ചിലിനു പകരം ലേബർ പാർട്ടി നേതാവ് ക്ലമെന്റ് ആറ്റ്ലി പ്രധാനമന്ത്രിയായതും ഇന്ത്യയ്ക്ക് അനുകൂലമായ ഒരു ഘടകമായി.
    ഗവൺമെന്റിന്റെ വിദേശ നയത്തെപ്പറ്റി പ്രസ്താവിക്കുന്ന കൂട്ടത്തിൽ ഇന്ത്യയെപ്പറ്റി ആറ്റ്ലി പറഞ്ഞ ഒരു നല്ല കാര്യം ഇതായിരുന്നു , "ഇനി ഒട്ടും വൈകാതെ ബ്രിട്ടൻ ഇന്ത്യയെ കൈയൊഴിയുകയാണ് വിവേകം. അത് ചെയ്യാതെ ഇനിയും പിടിച്ചുനിന്നാൽ ചിലപ്പോൾ സഹികെട്ടു തുടങ്ങിയ ഇന്ത്യക്കാർ നമ്മെ പെടലിക്ക് പിടിച്ച് പുറത്താക്കും. ഇന്ത്യയുടെ ശാശ്വത വൈരം സമ്പാദിക്കേണ്ടിയും വരും."
       ഒന്നിന് പിന്നിൽ ഒന്നായി ഇംഗ്ലണ്ടിൽ നിന്നും രണ്ട് പ്രതിനിധി സംഘങ്ങൾ ചർച്ചയ്ക്കായി ഇന്ത്യയിലെത്തി. ആദ്യം വന്നത് പാർലമെൻ്ററി പ്രതിനിധി സംഘം .വിവിധ പാർട്ടികളിൽ പെട്ട പത്ത് പേരടങ്ങിയ എംപിമാരുടെ സംഘത്തിൻറെ തലവൻ പ്രൊഫ.  റിച്ചാർഡ്സ് ആയിരുന്നു.  ഇന്ത്യയിലെ വിവിധ രാഷ്ട്രീയ നേതാക്കളെ കണ്ട് പ്രശ്നം പഠിച്ച ശേഷം അവർ തിരികെ പോയി റിപ്പോർട്ട് സമർപ്പിച്ചു. ഇന്ത്യയ്ക്ക് അനുകൂലമായി അവർ പറഞ്ഞു. "ഇന്ത്യക്ക് സ്വാതന്ത്ര്യം നൽകുന്ന കാര്യത്തിൽ ബ്രിട്ടൻ കാലതാമസം വരുത്തരുത്".
    ഇങ്ങനെയൊരു അഭിപ്രായം ലഭിച്ചശേഷം ആറ്റ്ലി മറ്റൊരു സംഘത്തെ അയച്ചു. മന്ത്രിസഭയിലെ മൂന്ന് പേരെ. സ്റ്റാഫോർഡ് ക്രിപ്സ്,  എ .വി. അലക്സാണ്ടർ , ഇന്ത്യ സ്റ്റേറ്റ് സെക്രട്ടറിയായ ലോഡ്സ്  പെത്തിക് ലാറൻസ് എന്നിവരായിരുന്നു  മൂന്നംഗ സംഘത്തിൽ.
   1946 മാർച്ച് 23ന് സ്റ്റാഫോർഡ് ക്രിപ്സിന്റെ നേതൃത്വത്തിലുള്ള മൂന്നംഗ മന്ത്രിസഭാ സംഘം ഇന്ത്യയിലെത്തി. അവർ കൊണ്ടുവന്ന നിർദ്ദേശങ്ങൾ ചുരുക്കത്തിൽ ഇതായിരുന്നു.
' ബ്രിട്ടീഷ് ഇന്ത്യയും നാട്ടുരാജ്യങ്ങളും അടങ്ങുന്ന ഒരു യൂണിയൻ ആയിരിക്കും ഭാവിഭാരതം. യൂണിയന് ഒരു നിയമസഭ. ബ്രിട്ടീഷ് ഇന്ത്യയുടെയും നാട്ടുരാജ്യങ്ങളുടെയും സംയുക്ത പ്രതിനിധികൾ അടങ്ങിയതാകും അത്. രാജ്യരക്ഷാ, വിദേശനയം, ഗതാഗതം, വാർത്താവിനിമയം തുടങ്ങിയ പ്രധാന വകുപ്പുകൾ കൈകാര്യം ചെയ്യാൻ യൂണിയന് അധികാരം ഉണ്ടായിരിക്കും.'
     ഈ വ്യവസ്ഥകൾ അടങ്ങുന്ന നിർദ്ദേശം ക്രിപ്സ് ഇന്ത്യൻ നേതാക്കൾക്ക് മുമ്പിൽവെച്ചു. ഇതിന്റെ അടിസ്ഥാനത്തിൽ ഉടൻ ഒരു താൽക്കാലിക മന്ത്രിസഭ ഉണ്ടാക്കാനും നിർദ്ദേശമുണ്ടായിരുന്നു.
     കോൺഗ്രസിന് ഇതിൽ പല വകുപ്പുകളും സ്വീകാര്യമായിരുന്നില്ല. പൂർണ്ണ സ്വാതന്ത്ര്യം നൽകുന്നതിനെപ്പറ്റി ഒന്നും പറയുന്നില്ല എന്നതായിരുന്നു ഏറ്റവും പ്രധാനമായ വൈകല്യം. ഭരണഘടന നിർമാണത്തെപ്പറ്റിയും ഒന്നും പ്രതിപാദിക്കുന്നുണ്ടായിരുന്നില്ല. ഭാരതത്തിന് ആവശ്യമായ ഭരണഘടന ഭാരതത്തിന് തന്നെ നിർമ്മിക്കാൻ പ്രാപ്തിയുണ്ടെന്ന കാര്യം ഓർമിപ്പിച്ചുകൊണ്ട്, എന്തുകൊണ്ടാണ് അതേപ്പറ്റി ഒന്നും ക്രിപ്സിന്റെ നിർദ്ദേശങ്ങളിൽ ഉൾക്കൊള്ളിക്കാതിരുന്നത് എന്ന് കോൺഗ്രസ് ചോദിച്ചു .കോൺഗ്രസിന് എതിർപ്പുണ്ടായിരുന്ന മറ്റൊരു നിർദ്ദേശം കോൺഗ്രസിനും ലീഗിനും തുല്യപ്രാതിനിധ്യം എന്ന ആശയമാണ്. ഇത്തരം കാര്യങ്ങളിൽ തൃപ്തികരമായ പരിഹാരം നിർദ്ദേശിക്കാൻ കഴിഞ്ഞെങ്കിൽ മാത്രമേ ഇടക്കാല ഗവൺമെൻറ് രൂപീകരിക്കുന്ന കാര്യത്തിൽ താല്പര്യമുള്ളൂ എന്ന് കോൺഗ്രസ് വ്യക്തമാക്കി .മാത്രമല്ല ഭരണഘടന നിർമ്മിക്കാനുള്ള അവകാശം ഇടക്കാല ഗവൺമെന്റിനും നൽകണം .ഭരണഘടനാ സമിതി ഇന്ത്യക്കാരുടെ മുഴുവൻ വോട്ടിനനുസരിച്ച് ആവണം . ഭരണഘടന വിഭക്ത ഭാരതത്തിൻറെതല്ല, സംയുക്ത ഭാരതത്തിൻറെ ആയിരിക്കുകയും വേണം. അധികാര കൈമാറ്റം ഈ ഭരണസമിതിയുടെ കൈകളിലേക്ക് ആയിരിക്കണം.
     പല പ്രശ്നങ്ങളിലും മുസ്ലിം ലീഗും കോൺഗ്രസും തമ്മിൽ ഭിന്ന ധ്രുവങ്ങളിലാണ് നിലയുറപ്പിച്ചത് . ജിന്നയുടെ പാക്കിസ്ഥാൻ വാദം ഒരു കീറാമുട്ടിയായി. മുസ്ലിം ഭൂരിപക്ഷ പ്രദേശങ്ങൾ ചേർത്ത് ഇന്ത്യയെ വിഭജിച്ച് പാക്കിസ്ഥാൻ രൂപീകരിക്കണം എന്നായിരുന്നു ജിന്നയുടെ നിലപാട്.  എന്നാൽ ജിന്നയുടെ അവകാശവാദം നിലനിൽക്കത്തക്കതല്ലെന്ന്  മിഷൻ ചൂണ്ടിക്കാട്ടി. പലഭാഗങ്ങളിലുമായി ചിതറിക്കിടക്കുന്ന മുസ്ലിം സമൂഹത്തെ കണക്കിലെടുത്താൽ അവർ അവകാശപ്പെടുന്ന ഭൂരിപക്ഷവാദം ശരിയല്ല,  അശാസ്ത്രീയവുമാണ് . ആ നിലയിൽ ആകെയുള്ള മുസ്ലീം സമുദായത്തിന്റെ നാലിൽ ഒരു ഭാഗം മുസ്ലിങ്ങൾക്ക് പോലും വിഭജനം കൊണ്ട് പ്രയോജനം ഉണ്ടാകുന്നില്ല. ആകെ മുസ്ലിം ജനസംഖ്യയുടെ എണ്ണവും ജിന്ന അവകാശപ്പെടുന്ന പ്രദേശങ്ങളിലെ മുസ്ലീങ്ങളുടെ എണ്ണവും ആയി തട്ടിച്ചു നോക്കുമ്പോൾ അവർ സങ്കൽപ്പിക്കുന്ന പാക്കിസ്ഥാൻ ഇന്ത്യയിലെ ചെറിയൊരു ശതമാനം മുസ്ലിങ്ങൾക്ക് മാത്രമേ പ്രയോജനപ്പെടുന്നുള്ളൂ എന്ന് ക്യാബിനറ്റ് മിഷൻ അഭിപ്രായപ്പെട്ടു . 
    എന്നാൽ ജിന്ന തൻറെ അവകാശവാദത്തിൽ ഉറച്ചുനിന്നു.  ഇടക്കാല ഗവൺമെന്റിൽ തങ്ങൾ പങ്കെടുക്കുകയില്ലെന്ന് ശാഠ്യം പിടിച്ചു. കോൺഗ്രസും ലീഗും തമ്മിലുള്ള അകൽച്ച ഇല്ലാതാക്കുന്ന കാര്യത്തിൽ തങ്ങൾ പരാജയപ്പെട്ടിരിക്കുന്നു എന്ന് ക്യാബിനറ്റ് മിഷന് മനസ്സിലായി .വൈസ്രോയിയുമായിആലോചിച്ച് മറ്റൊരു പരിഹാരം നിർദ്ദേശം അവർ മുമ്പിൽവെച്ചു.  വൈസ്രോയിയുടെ അധ്യക്ഷതയിൽ ഇടക്കാല ഭരണ സഭയുണ്ടാവും ഇന്ത്യൻ നേതാക്കളാവും പൂർണമായും അതിലെ അംഗങ്ങൾ കോൺഗ്രസുകാർ നിർദ്ദേശിക്കുന്ന ആറുപേർ,  ലീഗിൻറെ അഞ്ചു പ്രതിനിധികൾ , ഒരു സിക്കുകാരൻ ഒരു പാർസി ഒരു ഇന്ത്യൻ ക്രിസ്ത്യൻ. കോൺഗ്രസ് .ഈ നിർദ്ദേശം സ്വീകരിക്കാം എന്നേറ്റു. മുഹമ്മദലി ജിന്ന അപ്പോഴും വഴങ്ങിയില്ല. ഒടുവിൽ ജിന്നയുമായി കൂടിയാലോചിക്കാൻ ജവഹർലാൽ നെഹ്റുവിനെ ചുമതലപ്പെടുത്തി. ബോംബെയിലെ വസതിയിൽ ചെന്ന് നെഹ്റു ജിന്നയെ കണ്ടു സംസാരിച്ചു. ജിന്ന വഴങ്ങിയില്ല. പാകിസ്താനുവേണ്ടി പ്രത്യക്ഷ സമരം ആരംഭിക്കുകയാണെന്നും ജിന്ന നെഹ്റുവിനോട് പറഞ്ഞു. അതോടെ നെഹ്റുവിൻറെ നേതൃത്വത്തിൽ കോൺഗ്രസ് മന്ത്രിസഭ ഉണ്ടാക്കാൻ തീരുമാനിച്ചു. ലീഗ് സഹകരിക്കുവാൻ തയ്യാറാവുന്ന സമയത്ത് അവർക്ക് കൊടുക്കുവാൻ കുറച്ച് സ്ഥാനങ്ങൾ മാറ്റിവച്ചിരുന്നു. ഇങ്ങനെയൊരു തീരുമാനം പെട്ടെന്ന് കൈക്കൊള്ളുമെന്ന് ജിന്ന നിരൂപിച്ചിരുന്നില്ല കൂടിയാലോചന യ്ക് വീണ്ടും വിളിക്കും എന്നായിരുന്നു പ്രതീക്ഷ. ഇതിനിടയിൽ മുസ്ലിം ലീഗ് സ്വന്തമായ ഭരണഘടനയും അവരുടേതായ സംസ്ഥാനങ്ങളും ആവശ്യപ്പെട്ടു കഴിഞ്ഞിരുന്നു. അവയൊക്കെ ചേർത്തുകൊണ്ട് പാകിസ്ഥാൻ എന്ന പ്രത്യേക രാഷ്ട്രവും. കോൺഗ്രസും വൈസ്രോയിയും ചേർന്ന് ലീഗിനെ വഞ്ചിക്കുകയാണെന്ന് തോന്നി. ഈ വഞ്ചനയ്ക്കെതിരെ ജില്ല തന്റെ അനുയായികളെ പ്രത്യക്ഷ സമരത്തിന് ആഹ്വാനം ചെയ്തു. ആഗസ്റ്റ് 16 വഞ്ചനാ ദിനമായി ആചരിക്കുവാൻ ആയിരുന്നു ആഹ്വാനം. ജിന്ന  പറഞ്ഞു, "കോൺഗ്രസ് നമ്മെ വെല്ലുവിളിച്ചിരിക്കുന്നു .ഒരു തുറന്ന യുദ്ധത്തിന്. അതാണ് അവർക്ക് ആവശ്യമെങ്കിൽ നമുക്ക് ആ വെല്ലുവിളി സ്വീകരിക്കേണ്ടിയിരിക്കുന്നു' .അദ്ദേഹം തുടർന്നു. "ഒന്നുകിൽ ഇന്ത്യ വിഭജിക്കും അല്ലെങ്കിൽ രാജ്യം നശിക്കും" .
      രാജ്യം വർഗീയ ലഹളയുടെ ചുഴിയിലേക്ക് നീങ്ങുകയായിരുന്നു. അന്തരീക്ഷം പെട്ടെന്ന് മാറി. മുമ്പ് പലവട്ടം വർഗീയ കലാപങ്ങൾ പലഭാഗങ്ങളിലും അരങ്ങേറിയിട്ടുണ്ടെങ്കിലും അവയെയെല്ലാം കടത്തിവെട്ടുന്നതായിരുന്നു 1946 ആഗസ്റ്റ് 16ന് കൽക്കത്തയിൽ തുടക്കം കുറിച്ച വർഗീയ സംഘട്ടനങ്ങൾ. ബോംബെ, ബീഹാർ, യുപി, പഞ്ചാബ് തുടങ്ങിയ സ്ഥലങ്ങളിലേക്ക് ലഹള അതിവേഗം പടർന്നു. കൽക്കത്തയിലെ ചേരി പ്രദേശങ്ങളിൽ ആഗസ്റ്റ് 16ന് വെളുപ്പിന് ആയുധങ്ങളുമായി അക്രമികൾ തെരുവിലിറങ്ങി. വഴിയിൽ കണ്ടുമുട്ടിയവരെ ഒന്നും അവർ ജീവനോടെ വിട്ടില്ല. വർഗീയവാദികളായ ഹിന്ദുക്കളും ആയുധങ്ങളുമായി പുറത്തിറങ്ങി. ഇരുവിഭാഗവും ശിരസ്സു കൊയ്തു തുടങ്ങി. 24 മണിക്കൂറിനുള്ളിൽ ആയിരത്തിൽപരം ശിരസ്സ് കൽക്കത്തയിൽ മാത്രം ഉടലറ്റ് വീണു . 
    ..ബംഗാളിൽ ലീഗ് മന്ത്രിസഭയാണ് നിലവിൽ ഉണ്ടായിരുന്നത്. ലീഗ് നേതാവായിരുന്ന സുഹ്രവർദ്ധിയായിരുന്നു പ്രധാനമന്ത്രി. അതുകാരണം അക്രമം നടക്കുമ്പോൾ ബംഗാളിൽ മന്ത്രിമാരും പോലീസും നിസ്സംഗത പാലിച്ചു. അവരുടെ സാന്നിധ്യത്തിൽ സാമൂഹ്യവിരുദ്ധന്മാർ ആകാവുന്നതൊക്കെ ചെയ്തു. ലഹള ഉത്തരേന്ത്യ മുഴുവൻ ആളിപ്പടർന്നു. പതിനായിരക്കണക്കിന് ജനങ്ങൾ തെരുവുകളിൽ ജീർണിച്ചഴുകി.
    മനുഷ്യമനസാക്ഷി വിറങ്ങലിച്ചു നിന്നു. ഏറ്റവും കൂടുതൽ നരഹത്യ നടന്ന കൽക്കത്തയിലെയും ബീഹാറിലെയും ദാരുണമായ ചിത്രം പത്രങ്ങൾ അതിശയോക്തി കലർത്താതെ റിപ്പോർട്ട് ചെയ്യുകയുണ്ടായി. വർഗീയ കലാപം മഹാത്മാഗാന്ധിയെ വല്ലാതെ ദു:ഖിപ്പിച്ചു.  ചിരകാലമായി താൻ സ്വരൂപിച്ചുവെച്ച സ്വപ്നം തകരുകയാണല്ലോ എന്ന് അദ്ദേഹം ഓർത്തു. സ്വാതന്ത്ര്യത്തിന്റെ പടിവാതിൽക്കൽ ആണ് ഇന്ത്യ മോഹം തുളുമ്പി നിൽക്കുന്ന മനസ്സുമായി സ്വർഗ്ഗം തുറന്നു കിട്ടുന്ന മുഹൂർത്തവും കാത്ത് ഇമ വെട്ടാതെ ഇരിക്കേണ്ട സമയമാണ് ഇത്. പക്ഷേ ഭാരതീയർ നിർഭാഗ്യവാന്മാരാണ്. ഇത്തരത്തിലുള്ള ചിന്തയുമായി ആ  77 കാരൻ കയ്യിൽ  ഊന്നുവടിയുമായി എഴുന്നേറ്റു. ആരോടും യാത്ര ചോദിക്കാതെ കൂടെ പോരാൻ ആരെയും ക്ഷണിക്കാതെ ആ ഏകാന്തപഥികൻ പുറപ്പെട്ടു. 
      .ഗാന്ധിജി ആദ്യം ചെന്നത് നവഖാലിയിലെ ശ്രീരാം പൂരിൽ ഗംഗാ ബ്രഹ്മപുത്രാ നദികളുടെ അഴിമുഖത്തിനടുത്താണ്. ശ്രീരാംപൂർ ചെളികെട്ടി കിടക്കുന്ന ചതുപ്പ് നിലങ്ങളുള്ള ഗ്രാമത്തിൽ നിന്നാണ് ഗാന്ധിജി മതമൈത്രിയുടെ സന്ദേശവുമായി തന്റെ ദൗത്യത്തിന് തുടക്കമിട്ടത്.
    ബംഗാളിൽ വർഗീയ കലാപം പൊട്ടിപ്പുറപ്പെടുന്നതിലും നാലുദിവസം മുമ്പ് ആഗസ്റ്റ് 12ന് ഇന്ത്യയിലെ ഏറ്റവും വലിയ രാഷ്ട്രീയ പാർട്ടിയുടെ നേതാവ് എന്ന നിലയിൽ പണ്ഡിറ്റ്  ജവഹർലാൽ നെഹ്റുവിനെ ഒരിടക്കാല ഗവൺമെൻറ്  രൂപീകരിക്കാൻ വൈസ്രോയി  ക്ഷണിച്ചു. സർദാർ പട്ടേൽ,  രാജേന്ദ്രപ്രസാദ്,  അസഫലി,  രാജഗോപാലാചാരി, ശരചന്ദ്ര ബോസ്,  ജോൺ മത്തായി ,ബൽദേവ് സിംഗ്, ഷഫാത്ത് അഹമ്മദ് ഖാൻ, സി എച്ച് ബാഭ, ജഗ്ജീവൻറാം, അലിസാഹിർ എന്നിവരായിരുന്നു മന്ത്രിമാർ.
     സെപ്റ്റം.ബർ ഒന്നിന് സത്യപ്രതിജ്ഞ ചടങ്ങ് നടന്നു. ഒരു മാസത്തിലേറെ കോൺഗ്രസ് ഒറ്റയ്ക്ക് ഭരിച്ചു . ലീഗും പിന്നീട് മന്ത്രിസഭയിൽ ചേർന്നു.
       വർഗീയ കലാപം രാജ്യത്തിൻറെ പലഭാഗങ്ങളിലും ആളിപ്പടർന്നപ്പോൾ ബ്രിട്ടീഷ് അധികൃതർ നിസ്സംഗ സമീപനമാണ് സ്വീകരിച്ചത് ഇന്ത്യയെ വർഗീയാടിസ്ഥാനത്തിൽ വിഭജിക്കുന്നതിന് പറ്റിയ അന്തരീക്ഷം സൃഷ്ടിക്കുന്നതിന് ഇത് സഹായിച്ചു. ആയിരക്കണക്കിന് ആളുകളെ കൊന്നൊടുക്കിയ കലാപം നേരിടാൻ തുടക്കത്തിൽ പട്ടാളത്തെ നിയോഗിക്കാൻ ബ്രിട്ടീഷ് അധികൃതർ തയ്യാറായില്ല. കലാപം പടരാൻ ഇടയാക്കിയ ഒരു ഘടകം ഇതായിരുന്നു. ക്വിറ്റ് ഇന്ത്യ സമരകാലത്തും ആർ  ഐ  എൻ,  ഐ. എൻ. എ സമരഘട്ടങ്ങളിലും ജനങ്ങളെ അടിച്ചമർത്താൻ പട്ടാളത്തെ ഉപയോഗിച്ചിരുന്നു. ജനങ്ങൾ ബ്രിട്ടീഷ് ഭരണത്തിനെതിരെ രംഗത്തിറങ്ങുമ്പോ ഴെല്ലാം ബലപ്രയോഗത്തിലൂടെ അടിച്ചമർത്തുക എന്നതായിരുന്നു നയം. എന്നാൽ വർഗീയവാദികൾ ഉറഞ്ഞുതുള്ളാൻ തുടങ്ങിയപ്പോൾ അവരെ നിർദാക്ഷിണ്യം ഒതുക്കാൻ തയ്യാറായില്ല. ഇടക്കാല മന്ത്രിസഭയുടെ സുഗമമായ പ്രവർത്തനം തടസ്സപ്പെടുത്താൻ മുസ്ലിം ലീഗിന് ധൈര്യം പകർന്ന പ്രീണന നയമായിരുന്നു ബ്രിട്ടന്റേത്. ലീഗ് നേതാക്കന്മാരും ബ്രിട്ടീഷ് ഉദ്യോഗസ്ഥന്മാരും തമ്മിൽ ഗാഢബന്ധം ഉണ്ടെന്ന് നെഹ്റു പരസ്യമായി ആരോപിച്ചത് ഇതിൻറെയെല്ലാം അടിസ്ഥാനത്തിൽ ആയിരുന്നു .
      മതാടിസ്ഥാനത്തിലുള്ള ഭിന്നിപ്പിനു പുറമേ മറ്റൊരു പ്രശ്നവും ബ്രിട്ടൻ ഇന്ത്യയ്ക്കെതിരെ ഉപയോഗപ്പെടുത്താൻ ശ്രമിച്ചിരുന്നു. നാട്ടുരാജ്യങ്ങളെ .600 ഓളം നാട്ടുരാജ്യങ്ങളാണ് ഇന്ത്യയിൽ അക്കാലത്ത് ഉണ്ടായിരുന്നത് .ഇന്ത്യയുടെ മൊത്തം വിസ്തൃതിയിൽ 45% ത്തോളം ഇവയായിരുന്നു. ജനസംഖ്യയിൽ 25% നാട്ടുരാജ്യങ്ങളിൽ ആയിരുന്നു. നാട്ടുരാജ്യങ്ങളുടെ തലപ്പത്ത് രാജാക്കന്മാർ ഉണ്ടായിരുന്നെങ്കിലും യഥാർത്ഥ നിയന്ത്രണം ബ്രിട്ടീഷ് ഭരണത്തിന്റെ കയ്യിലായിരുന്നു . ബ്രിട്ടൻ ഇന്ത്യ വിടേണ്ടി വരുമെന്ന് ഉറപ്പായതോടെ രാജാക്കന്മാരിൽ പലർക്കും സ്വന്തം ആധിപത്യം ഉറപ്പിക്കാൻ മോഹമുദിച്ചു . ഇതിനു പ്രോത്സാഹനം നൽകാൻ ബ്രിട്ടീഷ് അധികൃതർ മുന്നോട്ടുവരികയും ചെയ്തു.  ഇന്ത്യ വിഭജിക്കുകയാണെങ്കിൽ ഏത് ഭാഗത്ത് ചേരാനുള്ള അവകാശവും നാട്ടുരാജ്യങ്ങൾക്ക് നൽകുമെന്നായിരുന്നു ഒരു വാഗ്ദാനം .ഇന്ത്യയിലും പാക്കിസ്ഥാനിലും ചേരാതെ സ്വതന്ത്രമായി നിൽക്കാനുള്ള അവകാശവും രാജ്യ ങ്ങൾക്ക് നൽകാനുള്ള ആലോചന നടക്കുന്നുണ്ടായിരുന്നു. സ്വതന്ത്ര ഇന്ത്യയ്ക്ക് അകത്തു തന്നെ പല സ്വതന്ത്ര രാഷ്ട്രങ്ങൾ സൃഷ്ടിക്കുക എന്നതായിരുന്നു ആശയം. സ്വതന്ത്ര രാഷ്ട്രങ്ങൾ എന്ന ആശയത്തിൽ നിന്ന് പ്രചോദനം ഉൾക്കൊണ്ട് ഹൈദരാബാദ് , കാശ്മീർ, ജനുഗേഡ്,  തിരുവിതാംകൂർ തുടങ്ങിയ നാട്ടുരാജ്യങ്ങൾ വേറിട്ടുനിൽക്കാൻ നീക്കം തുടങ്ങി .തിരുവിതാംകൂറിൽ രാമസ്വാമി അയ്യർ മുന്നോട്ടുവച്ച 'അമേരിക്കൻ മോഡൽ' ഭരണമെന്ന ആശയത്തിന്റെ പിന്നിലുണ്ടായിരുന്നത് സ്വതന്ത്ര തിരുവിതാംകൂർ വാദമായിരുന്നു.
    സ്വതന്ത്ര ഇന്ത്യയ്ക്കകത്ത് നിരവധി സ്വതന്ത്ര രാജ്യങ്ങൾ ഉണ്ടാക്കാനുള്ള പദ്ധതി നമ്മുടെ ദേശീയ നേതൃത്വവും രാജ്യങ്ങളിലെ ജനകീയ പ്രസ്ഥാനങ്ങളുമാണ് തകർത്തത്. രാജ്യങ്ങളിൽ പ്രത്യേകിച്ച് ,കാശ്മീർ, ഹൈദരാബാദ്, തിരുവിതാംകൂർ എന്നിവിടങ്ങളിൽ ജനങ്ങൾ ഈ പദ്ധതിക്ക് എതിരെ രംഗത്തുവന്നു. തിരുവിതാംകൂറിൽ നടന്ന ഐതിഹാസികമായ പുന്നപ്ര വയലാർ സമരം ഇതിൻറെ ഭാഗമായിരുന്നു. സർ സി പി രാമസ്വാമി അയ്യരുടെ മർദ്ദന വാഴ്ചയ്കും  വൻകിട  ഭൂ ഉടമകളുടെയും മുതലാളിമാരുടെയും അക്രമങ്ങൾക്കും എതിരെ തൊഴിലാളികളും കൃഷിക്കാരും കർഷകത്തൊഴിലാളികളും മറ്റു പാവപ്പെട്ട വിഭാഗങ്ങളും നടത്തിയ സമരമായിരുന്നു അത്.
   . 1946 ഒക്ടോബറിൽ നടന്ന ഈ സമരത്തിൽ നൂറുകണക്കിന് ആളുകളെ പട്ടാളവും പോലീസും കൊല ചെയ്തു . ഭീകരമായ മർദ്ദനം അഴിച്ചുവിട്ടു .നൈസാമിന് എതിരെ നടന്ന തെലുങ്കാന സമരവും കാശ്മീരിൽ അബ്ദുള്ളയുടെ നേതൃത്വത്തിൽ നടന്ന സമരവും ഇന്ത്യയെ പലതായി വെട്ടിമുറിക്കാനുള്ള പദ്ധതികൾക്ക് കൂടി എതിരായുള്ളവയായിരുന്നു. സർദാർ വല്ലഭായ് പട്ടേലിന്റെ നേതൃത്വത്തിൽ നാട്ടുരാജ്യങ്ങളെ ഇന്ത്യൻ യൂണിയനിൽ ലയിപ്പിക്കാനുള്ള ശ്രമങ്ങൾ വിജയിപ്പിക്കുന്നതിന് ഈ സമരങ്ങൾ സഹായകമായ പശ്ചാത്തലം ഒരുക്കി. വി പി മേനോൻ ആയിരുന്നു ഈ ശ്രമത്തിൽ പട്ടേലിന്റെ സഹായി.
 തയ്യാറാക്കിയത്: പ്രസന്നകുമാരി. ജി.

Monday, May 13, 2024

സ്കൂൾ പ്രാർത്ഥനാ ഗീതം/Adhyapakakkoottam

അധ്യാപകക്കൂട്ടം കുട്ടിപ്പാട്ടുകൾ

സ്കൂൾ പ്രാർത്ഥനാ ഗീതം

രചന, ആലാപനം : സുമന ടീച്ചർ (Rtd)

വിശ്വം നിറയും അറിവിൻ വെളിച്ചമേ 
അജ്ഞത തന്നന്ധകാരം മറയ്ക്കണേ 
നന്മകൾ തിന്മകൾ വേർതിരിച്ചറിയാൻ 
വിഘനങ്ങളെല്ലാമകറ്റിടുവാൻ 
സ്നേഹിക്കുവാൻ സ്നേഹം പങ്കുവയ്ക്കാൻ 
ദുഖിതർതൻ കണ്ണുനീർ തുടയ്ക്കാൻ 
എൻ കൊച്ചു വിദ്യാലയത്തിൻ സൽപ്പേരിനായ് 
എന്നെന്നും എന്നെന്നും നീ വിളങ്ങു 
എന്നെന്നും എന്നെന്നും നീ വിളങ്ങൂ......


Friday, May 10, 2024

നക്ഷത്രപ്പാട്ട്/Adhyapakakkoottam

അധ്യാപകക്കൂട്ടം UP Science

നക്ഷത്രപ്പാട്ട് 

നക്ഷത്ര സമൂഹങ്ങളെ പരിചയപ്പെടാൻ ഈ പാട്ട് സഹായിക്കും.
രചന, ആലാപനം : P ഗീത, SPMUPS ആയിക്കുന്നം, കൊല്ലം.
Youtube :



അക്കപ്പാട്ട്/Adhyapakakkoottam

അധ്യാപകക്കൂട്ടം കുട്ടിപ്പാട്ടുകൾ


അക്കപ്പാട്ട്

രചന, ആലാപനം : സുലേഖ ടീച്ചർ

Youtube




നാവിക കലാപം /Adhyapakakkoottam

അധ്യാപകക്കൂട്ടം സ്വാതന്ത്ര്യ സമര ചരിത്രം/ സംഭവങ്ങൾ

 70 . നാവിക കലാപം
              ഇന്ത്യൻ പട്ടാളത്തിൽ ബ്രിട്ടീഷ് വാഴ്ചക്കെതിരെ അസംതൃപ്തി  തുടങ്ങിയിരുന്നു .ഒരിക്കലും വിശ്രമം അനുവദിക്കാത്ത രീതിയിൽ തുടർച്ചയായി യുദ്ധം ചെയ്യേണ്ടി വന്നതു മൂലം ബ്രിട്ടീഷ് ഇന്ത്യൻ പട്ടാളം അസംതൃപ്തരായി. ഇന്ത്യയിലെ സാധാരണക്കാരോടൊപ്പം അവരിലും ദേശീയ ബോധം വളർന്നു. ഗാന്ധിജിയും നെഹ്റുവും ഇന്ത്യൻ പതാകയും വന്ദേമാതരവും ചലോ ദില്ലിയും അവരെയും ആകർഷിച്ചു തുടങ്ങി. പോലീസ് വിഭാഗത്തിലും ഈ സ്വാഗതാർഹമായ മാറ്റം വളരെ പ്രകടമായിത്തുടങ്ങിയിരുന്നു.
      ബ്രിട്ടീഷ് പട്ടാളത്തിലെ ഇന്ത്യൻ പട്ടാളക്കാർക്കിടയിൽ മാറ്റം വന്നുകൊണ്ടിരിക്കുന്നത് ഗവൺമെൻറ് മനസ്സിലാക്കിയിരുന്നു. ഐ. എൻ.എ.യുമായി യുദ്ധ മുന്നണിയിൽ ഏറ്റുമുട്ടിയപ്പോൾ തങ്ങളുടെ പട്ടാളത്തിലെ ഒരു യൂണിറ്റ് ശത്രുപക്ഷത്തേക്ക് നീങ്ങിയതും, പെഷവാറിൽ ചെങ്കുപ്പായക്കാരായ വാളണ്ടിയർമാരെ വെടിവെക്കാൻ പറഞ്ഞപ്പോൾ, അക്കാര്യം തങ്ങളെക്കൊണ്ട് ആവില്ല എന്നു പറഞ്ഞുകൊണ്ട് തോക്ക് തിരിച്ചു പിടിച്ചു കളഞ്ഞതും 'നിങ്ങൾക്കുവേണ്ടി ഇനി ഞങ്ങൾ തോക്കെടുത്തു യുദ്ധം ചെയ്യില്ല' എന്ന് ചില ബ്രിട്ടീഷുകാരോട് തന്നെ കളിയായി പറഞ്ഞതും അവരുടെ മനോഭാവം വ്യക്തമാക്കി.
   അരക്ഷിതത്വം തലയ്ക്കു മീതെ ഡെമോക്ലസിന്റെ വാൾ പോലെ തൂങ്ങി നിൽക്കുന്ന സന്ദർഭത്തിലാണ് ബോംബെയിൽ നാവിക കലാപം പൊട്ടിപ്പുറപ്പെട്ടത്. 1946   ൽ ഇന്ത്യക്ക് സ്വാതന്ത്ര്യം ലഭ്യമാകുന്നതിനും 18 മാസം മുമ്പ്. ആ വർഷം ഫെബ്രുവരിയിൽ. സ്വാതന്ത്ര്യസമര ചരിത്രത്തിലെ ഉജ്ജ്വല അധ്യായങ്ങളിൽ ഒന്നായ നാവിക കലാപ (ആർ.വൈ. എൻ അഥവാ റോയൽ ഇന്ത്യൻ നാവിക കലാപം) ത്തിന്റെ തുടക്കം  എച്ച് എം ഐ എസ് തൽവാറിൽ നിന്നായിരുന്നു. മോശമായ ഭക്ഷണത്തിലും മനുഷ്യത്വഹീനമായ പെരുമാറ്റത്തിലും പ്രതിഷേധിച്ച് 1946 ഫെബ്രുവരി 18ന് തൽവാറിലെ നാവികർ നിരാഹാര സത്യഗ്രഹം തുടങ്ങി. കപ്പലിൽ 1100 നാവികരാണ് ഉണ്ടായിരുന്നത്. കപ്പലിലെ കൊടിമരത്തിൽ 'ക്വിറ്റ് ഇന്ത്യ',  'ജയ്ഹിന്ദ്'  എന്നീ മുദ്രാവാക്യങ്ങൾ എഴുതിയതിന് ബി.സി. ദത്ത എന്ന നാവികനെ അറസ്റ്റ് ചെയ്തത്, അന്തരീക്ഷം പെട്ടെന്ന് പ്രക്ഷുബ്ദ്ധമാക്കി .നാവികർ പണിമുടക്ക് പ്രഖ്യാപിച്ചു. സമരം നയിക്കാൻ നാവികർ ഒരു സമരസമിതിയും രൂപീകരിച്ചു.  എം. എസ്. ഖാനായിരുന്നു സമരസമിതിയുടെ തലവൻ. മെച്ചപ്പെട്ട ഭക്ഷണം നൽകുക, വെള്ളക്കാർക്ക് തുല്യമായ വേതനം ഇന്ത്യൻ നാവികർക്കും നൽകുക,  തുടങ്ങി നാവികരെ മാത്രം ബാധിക്കുന്ന ആവശ്യങ്ങൾക്ക് പുറമേ,ഐ.എൻ.എ ഭടന്മാരെ മോചിപ്പിക്കുക, രാഷ്ട്രീയ തടവുകാരെ വിട്ടയക്കുക, ഇൻഡോനേഷ്യയിൽ നിന്ന് ഇന്ത്യൻ പട്ടാളക്കാരെ പിൻവലിക്കുക തുടങ്ങിയ രാഷ്ട്രീയ ആവശ്യങ്ങളും സമരസമിതി ഉന്നയിച്ചു.തൽവാറിലെ നാവികരുടെ പണിമുടക്കിന്റെ വാർത്ത കാട്ടുതീ പോലെ പടർന്നു. അടുത്ത ദിവസമായപ്പോഴേക്കും ബോംബെ തുറമുഖത്ത് നങ്കൂരമിട്ടിരുന്ന 22 കപ്പലുകളിലേക്ക് കൂടി സമരം വ്യാപിച്ചു. കപ്പലുകളുടെ നിയന്ത്രണം കലാപം നടത്തുന്ന നാവികരുടെ പക്കലായി. കപ്പലുകളിലെ കൊടിക്കൂറയിൽ നിന്നും ബ്രിട്ടന്റെ പതാകയായ യൂണിയൻ ജാക്ക് അഴിച്ചുമാറ്റി പകരം മൂന്നു കൊടികൾ ഒന്നിച്ചു കെട്ടി ഉയർത്തി - കോൺഗ്രസിന്റെ ത്രിവർണ പതാകയും, കമ്മ്യൂണിസ്റ്റ് പാർട്ടിയുടെ ചെങ്കൊടിയും, മുസ്ലിം ലീഗിൻ്റെ ചന്ദ്രക്കലാങ്കിതമായ പച്ചക്കൊടിയും. ഇന്ത്യൻ ജനതയുടെ ഐക്യത്തിന്റെ പ്രതീകമായിട്ടായിരുന്നു മൂന്നുകൊടികൾ ഒന്നിച്ചുയർത്തിയത്.
      നാവികരുടെ കലാപം ബ്രിട്ടീഷ് ഭരണത്തെ ശരിക്കും ഞെട്ടിച്ചു. ഫെബ്രുവരി 20ന് വൈകുന്നേരത്തിനകം ആയുധം വെച്ചു കീഴടങ്ങാൻ കലാപകാരികൾക്ക് അധികൃതർ അന്ത്യശാസനം നൽകി. അന്ത്യശാസനത്തിന്റെ കാലാവധി തീർന്നിട്ടും നാവികരാരും കീഴടങ്ങിയില്ല. നാവികരുടെ കലാപത്തെ നേരിടാൻ കരസേനയെ ബ്രിട്ടീഷ് അധികൃതർ രംഗത്തിറക്കി. കലാപകാരികൾക്ക് നേരെ പട്ടാളം വെടിവെച്ചപ്പോൾ നാവികർ തിരിച്ചും വെടിവച്ചു . കാസ്റ്റലെബാരക്കിൽ സമരം ചെയ്യുന്ന നാവികരുടെ നേരെ ഫെബ്രുവരി 21ന് വെടിവെക്കാൻ ബ്രിട്ടീഷുകാരനായ പട്ടാളമേധാവി ഉത്തരവിട്ടു. കരസേനയിലെ ഇന്ത്യക്കാരായ പട്ടാളക്കാർ വെടിവെക്കാൻ തയ്യാറെടുക്കുമ്പോൾ നാവികർ ഉച്ചഭാഷിണിയിലൂടെ വിളിച്ചുപറഞ്ഞു,
" ഇന്ത്യക്കാരായ പട്ടാളക്കാർ ഇന്ത്യക്കാരായ നാവികരുടെ നേരെ നിറയൊഴിക്കരുത് .നാം സഹോദരന്മാരാണ്"  നാവികരുടെ നേരെ ഉന്നം വെച്ച് നിന്ന പട്ടാളക്കാർ ഉടൻ തോക്കുതാഴ്ത്തി. 
        നാവിക കലാപത്തിന്റെ ഒരു സവിശേഷത, സമരം ചെയ്യുന്ന നാവികരോട് അനുഭാവം പ്രകടിപ്പിക്കാൻ ജനങ്ങൾ മുന്നോട്ടു വന്നതാണ് .ബോംബെയിൽ നൂറുകണക്കിനാളുകൾ പഴങ്ങളും മധുരപലഹാരങ്ങളുമായി ലോഞ്ചുകളിൽ കപ്പലുകൾക്കരികിലേക്ക് ചെന്നു. കലാപകാരികൾക്ക് പിന്തുണ നൽകിക്കൊണ്ട് പണിമുടക്ക് നടത്താൻ ബോംബെയിൽ കമ്മ്യൂണിസ്റ്റ് പാർട്ടി ആഹ്വാനം ചെയ്തു. ഫെബ്രുവരി 22ന് നടന്ന പണിമുടക്കിൽ മൂന്നുലക്ഷത്തോളം തൊഴിലാളികളാണ് പങ്കെടുത്തത്. പണിമുടക്കും ഹർത്താലും നേരിടാൻ പട്ടാളത്തെ രംഗത്തിറക്കിയതോടെ ബോംബെ നഗരത്തിൽ പൊരിഞ്ഞ സംഘട്ടനങ്ങൾ നടന്നു .നഗരത്തിന്റെ പല ഭാഗങ്ങളിലും ജനക്കൂട്ടത്തിന് നേരെ പോലീസ് വെടിവെച്ചു. വെടിവെപ്പിൽ 228 പേർ മരിക്കുകയും 146 പേർക്ക് പരിക്കേൽക്കുകയും ചെയ്തതായാണ് ഔദ്യോഗിക കണക്ക്.
      നാവിക കലാപം ബോംബെയിൽ മാത്രം ഒതുങ്ങി നിന്നില്ല. കറാച്ചി,  മദ്രാസ്,  വിശാഖപട്ടണം,  കൽക്കത്ത എന്നിവിടങ്ങൾക്ക് പുറമേ ബഹറിൻ, ഏഡൻ എന്നിവിടങ്ങളിലെയും നാവിക താവളങ്ങളിൽ ഇന്ത്യൻ നാവികർ പണിമുടക്കി.
    നാവിക കലാപത്തിന്റെ അലയൊലി മറ്റു സേനാ വിഭാഗങ്ങളിലും പ്രകടമായി. ബോംബെ,  മറൈൻഡ്രൈവ്, അന്ധേരി,  സിയോൺ എന്നിവിടങ്ങളിലെയും പൂന, കൽക്കത്ത , ജസ്സോർ, അമ്പാല എന്നിവിടങ്ങളിലെയും വ്യോമസേനാ കേന്ദ്രങ്ങളിലെ വ്യോമസേനാംഗങ്ങൾ നാവികരോട് അനുഭാവം പ്രകടിപ്പിച്ചുകൊണ്ട് പണിമുടക്കി. ജബൽപൂരിൽ കരസേനയിലെ ഇന്ത്യൻ പട്ടാളക്കാരും പണിമുടക്കി നാവികരോട് ഐക്യദാർഢ്യം പ്രകടിപ്പിച്ചു.
       ബ്രിട്ടീഷ് ഭരണത്തെ പിടിച്ചു കുലുക്കിയ നാവിക കലാപം അധികനാൾ നീണ്ടു നിന്നില്ല. ദേശീയ നേതൃത്വം കലാപത്തെ പ്രോത്സാഹിപ്പിക്കാൻ തയ്യാറായിരുന്നില്ല .
സമരം അവസാനിപ്പിക്കാൻ കോൺഗ്രസ് നേതൃത്വം നാവികരോട് ആവശ്യപ്പെട്ടു. സർദാർ വല്ലഭായ് പട്ടേലാണ് സമരം അവസാനിപ്പിക്കുന്നതിനുള്ള ശ്രമങ്ങളുടെ മുന്നിലുണ്ടായിരുന്നത്. ഒടുവിൽ നാവികർ കീഴടങ്ങി.
     നാവിക കലാപം വിജയിച്ചില്ലെങ്കിലും അതിൻ്റെ പ്രത്യാഘാതം വളരെ വലുതായിരുന്നു. ബ്രിട്ടീഷ് ആധിപത്യത്തിന്റെ മുഖ്യ ആശ്രയമാണ് പട്ടാളം. കര- വ്യോമ- നാവികസേനകളുടെയും പോലീസിന്റെയും കൂറിൽ ചെറിയ പോറൽ പോലും ഏൽക്കുന്നത് അപകടമാണെന്ന് അവർക്കറിയാമായിരുന്നു. ഇന്ത്യയിൽ തങ്ങളുടെ നാളുകൾ എണ്ണപ്പെട്ടു എന്ന് ബ്രിട്ടന് ബോധ്യമായ സംഭവങ്ങളിൽ പ്രധാനപ്പെട്ടതായിരുന്നു നാവിക കലാപം.

 തയ്യാറാക്കിയത്: പ്രസന്നകുമാരി. ജി.

Wednesday, May 8, 2024

Tuesday, May 7, 2024

മെയ് 8 - ലോക റെഡ്ക്രോസ് ദിനം /Adhyapakakkoottam

അധ്യാപകക്കൂട്ടം ദിനാചരണങ്ങൾ

മെയ് 8 - ലോക റെഡ്ക്രോസ് ദിനം

ലോകത്തിനു മുമ്പിൽ ആതുര സേവനത്തിൻ്റെ മഹനീയ മാതൃക തീർത്ത റെഡ്ക്രോസ് എന്ന മഹാപ്രസ്ഥാനത്തിൻ്റെ പിറവിക്കു പിന്നിലെ സംഭവ കഥ.......

അവതരണം: കെ.വി.പ്രസാദ്, മുക്കം.
സാങ്കേതിക നിർവ്വഹണം: സൗപർണിക സ്റ്റുഡിയോ, മുക്കം.